Jugendfest-Rock

Jugendfestrede von Ueli Häusermann...

Drucken
Teilen

Wo mer de Jugendfest-Presidänt vo dem Johr, de Martin Stücheli, agfrogt het, öb ich am Jugendfest a chorzi Red of em Metzgplatz wörd halte, ben i mer no ned ganz sicher gsi, öb ich die Useforderig söll ane.
Es esch mer eigentlich ned klar gsi, was das heisst, vor soo vell junge Lüüt z'rede.
"Jo, was interessiert die denn eigentlich?", esch mer als erschts dur de Chopf.

Die send doch met erne Gedanke sicher no a de Voröbe wo de Sir Colin und de DJ Pink heisse Sound ufgleit händ ond wo vellecht die heimlich Liebi imene andere schöni Auge gmacht het. - Wär absolut ned cool!
Chönds öpe d‘Hauptme-Wahl oder d‘Wahl zum Fähndrich si oder eifach nur‘s Manöver vo höt Z‘Mittag?

Mini Gedanke sind hin und her, de Schribblock, won ich vor mer gha ha isch emmer no wiss und leer blebe.
Je nöcher s'Jugendfescht cho esch, um so me hani glitte. Dass das de schönscht
Tag z'Lenzburg söll sie, vo dem han ich be mer no gar ned vell gspürt.
Im Gegeteil: Jede Obe wenn ich vom schaffe hei cho ben, han ehn gseh uf mim Pult legge - schön wiss, leer und dick, Tag für Tag - Obe für Obe.

Am letschte Samschtigobe während dem mer de Dütschland-Argentinie-Match gluegt händ, rüeft de Block plötzlech energisch us mim Büro: „Jetzt löpfts mer denn de Huet! - Hey du, wie lang muess ich no warte bes du mol d'Jugendfeschtred of mer schriebsch?
„Ich ha gmeint, du hebsch immer so gueti Idee", het er witer gmotzt. „Meini alles warmi Luft", hets tönt.
Es het mech zwar gfreut, dass die Dütsche gwonne hend, aber gschlofe hani trotzdem schlächt. Emmer han ich ah die cheibe Red müesse dänke.

Denn am Sonntigmorge esch es passiert!
Flash-Crash-Päng-Explosion: Endlech, was för en Erliechterig!
Die Idee!! De Jugendfescht-Rock!
Nei, ned de wissi churzi, wo alli Oberstüfler-Meitli zu junge, hübsche und fröhliche Dame macht, falsch!
Au ned de, wo d‘Rothhuusgass zum elegante Catwalk verwandlet, wenn de Umzug dure goht - nei es isch de Rock, wo de Von Rohr emol gseit het, nämmli es bruchi meh Dräck!

Jo, es sind fascht 25 Johr her wo mini 3 Frönde ond ich exakt do ufern Metzgplatz eusi Band Masterpflaster alässlich vom Jugendfescht-Samschtig em Metschg-Platsch-Openair gründet händ und mer euse 1. Uftrett händ döffe flire.
Also ehrlich: Fiire isch meh als nor übertriibe, eigentlich semmer öppe glich nervös gsi, wie ich jetzt. Mer händ versuecht euse Uftritt mit dere bekannte und immer beliebte Floskle: „one one, two two check-soundcheck"
use z‘zögere bis nümme anders gange esch. Denn hämmer müesse is chalte Wasser sprenge.

Der erschti Song wo mer gschpilt händ, isch vo de Rolling Stones gsie und het „Under my Thump" gheisse. S'Publikum het eus en super Applaus gschpändet und euses Lampefieber esch wi wegblose gsi. De Uftritt het nur 25 Minute duuret. I de Zuegab hend sech d'Gitarrischte uf de glühende Saite d'Finger wund spellt, d'Verstärcher hend groche und underem Schlagzüüg esch fascht d‘Bühni zärnebroche.
Guet iverstande, ganz eso tragisch esch es jo ned gsi, aber nach
eusem erschte Konzert hämmer bschlosse, wiiter zäme Rock z'mache.

Di Songs vo de Beatles, Stones, Lynird Skinard sind of em Metgplatz total guet iigfahre. 1 de Ziitig hämmer voller Stolz gläse: „Masterpflaster Jugendfest-Rock in fast unbegrenzter Spiellaune!" Cool oder?
Wänd er mol ghöre wie sone Rentner-Gängschter-Kapälle tönt?
(fragend an die Kinder)

Wänd eis wörkli ghöre? Trouet er euchne Hip Hop-prüefte Ohre euse
Kulturustuusch zue, das heisst Musig vo euchne Eltere, wos ade Voröbe no
tanzed händ dezue?
(fragend an die Kinder)
Also, döfi de Andy, de Rick on de Urs um Unterstützig bitte? Mer spelled eu ganz en churze, alte Song vo de Beatles wo fürs Jugendfescht super passt.

Urs, checksch du d‘Mics? (Urs one one two two check sound)
Nach dem Stück:

Ich möcht mech bi euch Schüeler, Lehrer, und Zuehörer herzlich bedanke, dass er emmer no alli do send.
Min Sohn het nämlech met mer gwetet, dass spötestens nach 3 Minute niemer me wird urne si, aber do esch er so falsch gläge, wie be Dütschland-Spanie. Ich wünsche allne no ganz es schöns Fescht!

Aktuelle Nachrichten