Dr gross Migrante-Strom vo Norde
däät luut Merkel - iberborde,
und d Statistiker duets dungge,
es syyg dr IQ mächtig gsungge,
will Wisseschaftler, Philologe,
Lehrer, Forscher, Theologe,
Ingenieur, Jurischten, Ärzt
in d Schwyz abwanderen und das schmärzt.
Zrugg blyybe - schynts - bim ene Bier
vyyl Empfänger vo Hartz vier.
Uus Bayre heersch e Riise-Gschteehn,
dass alli die, wo's Land verleehn
und d Schwyz als Arbetsort dien wähle,
em Schwoobeland dien Styyre stähle.
Fir jeede Akademiker,
Syg är au Legastehniker,
wo Daag fir Daag - ganz unverdrosse
schaffe duet bi Aidgenosse,
schrybbt dr Freystaat gopferglemmi
e halbi Kischte glatt ins Kemmi
Seibi Alti Garde

Mir Basler sinn us bsundrem Holz,
in unsrer Stadt am Rhy,
mir wisse das und sinn druff stolz
vom Santihans bis Bruederholz:
Scheen isch s, e Bebbi z syy.

Ganz bsunders gärn, s isch Tradizion,
duesch iber d Ziircher lache,
doo z Basel haisst s mit lychtem Hohn,
s syg eine, wo in Ziiri wohn
doch aifach nit ganz bache!

Ja, punkto Gaischt und Intelligänz
mien d Ziircher undeduure,
s kunnt IQ-mässig kain in d Kränz,
s goht ehnder Richtig Frieh-Demänz
und grosser Ziiri-Schnuure.

Das gits doch nit, das wär jo glacht,
das leen mer is nit biete!
Helm auf! Jetz haue mers ind Schlacht,
die Zircher wärde z Boode gmacht,
ewägg mit däne Niete!

Die erschte zwai, oh jeeminee,
die hämmer scho erlegt,
gschafft hänn si bi der BVB
und schwupps! - scho sinn si niene mee
die hänn s gar noonig tscheggt!

Mer wetze si jetz uus, die Scharte,
mit Mordio, Gezeter,
mer ziehn in Krieg, as Basler Garde
mit Uniform und Hellebarde,
mir, d Basler Sporepeter!.
Sporepeter

Oob 1:12, oob aarm, oob ryych,
die letschti Stund schloot alle glyych!
Fiir Hindu, Moslem, Jud und Chrischt,
gilt uswäägloos em Dood syy Frischt,
wo konzentriert scho d Sänse wetzt
und denn dym Lääbe s And uffsetzt.
Pfluderi

Verdiensch was verdiensch?
Maischtens, wenn duesch flyssyg schaffe,
kasch kai Ryychtum zämmeraffe.
Grampfsch e jeede Daag im Schtolle,
griegsch zwoor Loon, das isch jo s tolle.
Aber ebbs am Moonetsändy,
längt fir Miety, Schtyyre, Handy,
dasch no lang nit immer klar,
wenns das duet, isch wunderbar.

Hesch schtatt Arbet zwai, drey Kind,
bisch frisch gschiiden, oder blind,
schaffsch im Migros, Konsy, Denner,
Lidl, Aldi - bisch e Senner?
Coiffeur, Begger, Buechverkaifer,
Gärtner oder Botelaifer,
kasch vo däm, wo yynekunnt,
fascht nur lääbe wiene Hund.

Verdient hesch das ganz sicher nit!
D Vordrääbler vo de gääle Daggel

In Baasel duet me heecher baue,
wil s kai Blatz git zem versaue,
saage die, wo brojäggtiere,
mit Wulggegratzer d Stadt verziere.
Es ligt in de Naduur vom Maa,
dass äär will der Greeschti haa.
Der Mässeduurm bald nimme elai
wiirggt nääbem Roche-Duurm glyy scho glai.
Und der Neggschti kunnt beschtimmt,
wo der ersehnti Blatz yynimmt!
In de Aalaage, uff de Matte,
liige d Bebbi bald im Schatte!
Die Zytlose

Es isch emol en Aff gsi.
Da het e hooli Biire gha.
In dr Biire hets e Kischtli gha.
In dam Kischtli het s e Zeedel gha.
Und uff däm Zeedeli isch gstande:
Es isch emol an Aff gsi.
Da het e hooli Biire gha.
In dr Biire het s e Kischtli gha.
In dam Kischtli het s e Zeedel gha
Und uff däm Zeedeli isch gstande:
I gang in d Politigg.
Denn d Politigg als Gschäft isch eerlig,
Und Meegligkaite dert sin heerlig:
Me griegt im Root als Aff vo Wält
Statt Soziaalhilf - richtig Gäld!
Dupf Club

Dr Lällekeenig und dr Gryff
steen kontrowäärs zer Bruggemitti
am Käppelijoch stoot e Kameel ganz styff
s isch so ne Minderbaasler Lumpeditti
Het dr Wääber ächt doch rächt
mit syne Aazyg im Groosseroot
äär manifeschtiert sich aifach schlächt
und bringt sich so in groosi Noot.
Gillerugger