Fasnacht
Schnitzelbänke: Das macht im Zurzibiet Schlagzeilen
Eine unverbindliche Auswahl der besten Schnitzelbänke von der Fasnacht aus Bad Zurzach, Klingnau und Würenlingen.
Schnitzelbänke im Zurzibiet 2017
D’Haarspalter (v.l.): Philipp Zimmermann, Dani Bopp, Susi Bopp und Hermann Märki.
«Perfidos», Würenlingen
Über Neu-Grossrat Andreas Meier
Wie en Emmigrant isch er devo.
Hät z’Chlingnau und Asyl becho.
Det hät de Sterne-Meier kandidiert,
und als Zorzibiet-Grossrot grad brilliert!
Do g’seht mer, dass au en Asylant,
e Chance hät i eusem Land!
---
Über die Refuna
En Wasser-Schtrahl, wie bim Jet d’eau,
isch bim Wiesseschtei zum Bode us cho.
Mer hät scho de Botta welle b’schtelle,
es Thermal-Bad z’boue bi dere Quelle.
De Botta bruchts nöd – da merked’s gli:
S’isch bloss es Refuna Brüchli g’si!
---
A de’r Abklärig vo dem Rohr-Bruch
isch mer zwar no dra.
Wohrschienli häd aber de Müller
z’viel Druck uf de Leitig g’ha!
---
Über den toten Bär(en)
Oh Morgerot, oh Morgerot!
Zom güdr›e im Bäre isch’s jetz z’schpoht!
Kei Wy, kei Bier chasch det me ha,
und kein Salot mit Servela!
Oh Morgerot, oh Morgerot!
De Alex isst diheim sis Zmorge-Brot!
Oh Obigrot, oh Obigrot!
Nur no d’Fassade vom Bäre schtoht!
Die Feischter lueged truurig dri,
sie säged: «Tschüss — das isch es g’si !»
Oh Obigrot, oh Obigrot !
De letscht Würlinger Bär isch mause-tot!
---
Fastnachtsumzug Würenlingen 2017 Fastnachtsumzug Würenlingen 2017: Lucky Luke Würenlingen Keller und Meier‘s Kinder, Würenlingen
---
«Di Schiiheilige», Würenlingen
---
Über den Gotthard und das AKW Beznau
Es grosses Highlight isch gsii das Johr,
de längscht Tunnel händs uftah, es isch wohr.
E grandiosi Leischtig esch das gsi vo de
Ingscheniöre,
het mer vo allne siite chöne ghöre.
De Gotthardtunnel esch en Wältrekord,
het grüert als bisher Bekannte über Bord.
Drum händ, d Ingscheniöre vo de Beznau
Dänkt so en Rekord, das chönd mir au!
Si hend sich öppis überleit,
und ihres Chraftwerk stille gleit.
De Rekord isch, dass na ganz viel Wasser wird passiere d’ Aare
Bis si merked, dass si de Chübel nie meh werded ufe fahre.
---
Aus s KKL wött so en Rekord,
drum fahreds de Chübel ue und abe im Akkord.
---
Über das Energiesparen
Z Würelinge macht mer de grossi Worf,
es schalted znacht d Belüchtig ab im Dorf.
Drof abe gits en huufe reaktione,
Mängi findets guet, das mer tuet d Umwelt schone.
Di andere die sind erzürnt und hässig,
im dunkle hei laufe findets überhaupt nöd lässig.
Do drufabe gits en Kompromiss,
am Wocheend brenne loh, denn hört uf das Gschiss.
Was chönnti denn als nöchschts no cho,
sölled mer scho bald d Chileglogge schwiige loh?
Werdet mer allne Bauamts Mitarbeiter es E-Bike chaufe,
Oder müend die zuekünftig sogar laufe?
S erschte Bike das isch scho fliisig in Betrieb,
Vom Bauamt zum Gmeindhuus radle, isch am Igor sin Ziitvertriib.
Er het au nöd länger, das het er gseit,
üsse Igor isch halt scho en fitte Cheib.
---
Über Asylanten, das GoEasy und TV Endingen
Bi de Grossrotswahl gwönnt de Andreas Meier
sin Sitz sogar mit falschem Flyer.
Rekinge wird na Schwiiz-bekannt
Was dene ihre Gmeindrot will esch allerhand:
Er seit, mir wänd kei Asylante ha
Drum büütet dem Pack ja kei Wohnruum aa.
Händ d Endiger zwenig is Go Easy investiert
Het drum de Betriiber d Bilanz deponiert?
Für was nemed jetzt denn d Surbtaler s Portemonnai före?
Investierets jetzt is Projekt Doppeltöre?
De Andreas Senn loht sich spöter pensioniere,
und tuet jetzt im Stumpe obe residiere.
---
«d' Glöggler», Klingnau
Über den Pizza-Take-Away im Städtli
D’ Pizza Very Good händ sich z’ Chlingnau langsam etabliert,
und einigi vo eus händ au scho e Pizza vo dem probiert.
A eim Tag im Sommer hät mer sich ächli lang müesse gedulde,
dänn de Pizza-Maa hät sis Auto nömme gfunde.
Im Birchmeier sind Baggerfahrer hät de Pizza-Wage eifach überrollt.
Mir understelled do nüt, war sicher ned gewollt.
De Döttiger Investor muess ja no kei Beize-Konkurrenz usschalte,
bim Monti isch jo immer no alles bim alte.
---
---
Über die Friedhofs-Kapelle
Eine lauft im Chlingnauer Gmeindrot of ere eigene Spur,
und das scho set Johre konsequent und stur.
Bim Sprützehüsli tuets bi de Abstimmig no für de Felix laufe,
aber bi de Friedhofskapelle lönd sich d’ Lüt nömm für dumm verchaufe.
Zwoi Mol hämmer das Projekt scho abgschosse,
aber das Dossier vom Herr Lang esch nonig gschlosse.
D’ Lüt wänd eifach im Schärme stoh, also langed 4 Pföschte und es Dach,
drum mached mir die baufälligi Kapelle eifach flach.
---
Über die Senioren des FC Klingnau
Bi de Seniore vom FC Chlingnau spieled no es paar bekannti Näme,
und trotzdem bringeds ned immer e ganzi Mannschaft zäme.
So sends au fürs Spiel gege Schinznach ned
komplett,
d’ Einigung für e Spielverschiebig findet de Trainer mega nett.
Als Dankeschön hät er de Gegner en Harass Bier versproche,
und de Eggspühler haltet sich wirklich dra.
Trotz Unentschiede und Freibier wot kei richtigi Stimmig ufcho,
kei Wunder, hät doch de Trainer alkoholfreis Bier mitgnoh.
---
Am Schmutzigen Donnerstag eröffnen die "Räbehegel" die Klingnauer Fasnacht.
---
Über das Klingnauer Wasserproblem
Z’ Chlingnau drülleds eus de Wasserhahn zue,
Nitrat händs drin gfunde zwar meh als gnueg.
Subers Wasser muess a absoluti Pflicht für jedi Gmeind si,
drum gsämmer de Wasserstop au absolut i.
Bi eusne Nochbere esch d’ Wasserqualität eis A,
also zapfed mer s’ Wasser eifach z’ Döttige a.
I de Diskussion gömmer usere starke Position, nur Rueh.
Suscht esch für dene ihre Scheiss de Kläralagschieber sehr schnell zue.
---
«Kurärzte», Bad Zurzach
---
Über die Schliessung des Bezirkgefängnisses
S’ Gfängnis esch- ab em Sommer nüme offe
Und de Gmeindrot duet uf Rüümlichkeite hoffe
Peitsche und Handschälle söttis dete ha
Drum stoht d’Männerriege setme Johr scho a.
---
Über den abgetretenen Vizemann Mäni Moser
S’Tunnel en planig, und kei Änd in Sicht
De Mäne poltered und fluecht bis er umbricht
Wär hättis dänkt de Mäne seit ade und lätscht
Wohrschinlech hät em d’Astrid vorher eini tätscht.
---
Über Rheintal+
Alli wänd die Fusion und planed Rhytal plus
Nur de Buffy findet das en riese Stuss
So Immigrante wäred geg de Riehtner Stolz
Drum macht ers wie de Trump und baut e Muur us Holz.
---
Über Papa Moll
Jetzt macheds z’Zorzi no en Film zum Papa Moll
Es Millionebudget das wird sicher toll
S’Ziel vom Film mer händs vom Roy direkt verno
Das esch d’Bsuecherzahl vom Minigolfe schlo.
---
Über das Turmhotel
Mer händ Insiderinformation das es en neue Leiter Hochbau für Zorzi git
Bem Abriss vom Turm - muends jetzt leider spare
Und chönd drum nüme mit de grosse Gschütz uffahre
Doch für d’Zerstörig händs e Abrissbire gfunde
De Pascal Felber – en chline dicke runde.
---
Über die Feuerwehr
D’Führwehr macht - es Trainingstüürli
Und streift in Riethe - rächts es Müürli
En Schlänker noch links - vomene Füürwehrma
Das cha halt nor – e d’Hose go.
---
«D’ Haarspalter», Klingnau
---
Über einen Lapsus beim Start des Fasnachtsumzugs
Zum de Fasnachtsumzug starte,
tüend alli uf em Bolliger sin Böllerschuss warte.
Im Schlosshof, wo festlich isch dekoriert,
het er a de Zündschnur ume hantiert.
Und au de Beat hät’s nid so mit plane,
d’ Rakete flügt hülend i d’ Aargauer Fahne.
---
Über das Gastspiel des Circus Knie
En Hit sind sini Uftritt gsi,
mer meined s’ Gastspiel vom Circus Knie.
Nur eusem Tipp, so im Vertraue,
händ d’ Zirkuslüüt nid welle glaube.
Wenn ihr no s’ paar Kamel müend ha,
chlopfed bim Stadtratszimmer a.
---
Über die Christbaumqualität im Unteren Aaretal
Oh Tannebaum, oh Tannebaum,
e so es Bäumli isch en Traum.
So chömed d’ Lüt in Schare z’ laufe,
zum bim Felix es Bäumli chaufe.
Nur längt sich mänge Klingnauer an Grind,
will die schönste Bäum us Döttige sind.
---
Über einen Fauxpas in der Gemeindeverwaltung
Sit 30 Johr sig er bim Bauamt agstellt,
wird über de Otto i de Propstei verzellt.
Sis viele Chrampfe will d’ Gmeind honoriere,
en grosse Apéro em Bugmann spendiere.
Doch s’ Zähle bi dene schint Glückssach z’ si,
s’ Jubiläum wär es Johr früehner gsi!
---
Über den Klingnauer Sparpapst
S’ Geld für d’ Schuel, das tuet ihn reue,
de Lang will’s lieber im Friedhof verseue.
Scho de Planigskredit, en richtig grosse,
hät d’ Städtlibürger vor de Kopf gstosse.
En Friedhofkapelle für fascht e Million Franke,
do säged sogar die underem Bode
«Nei, Danke»!